usingha.com

উত্তম সিংহ
নিউইয়র্ক
৮.৮.২০১১

Read in Flash

থতা ধরুনিঃ ইকরা এহানর চিংনাংহান দেহিয়া পাকরেকুরাই উঙিতে পারে! বেলীগ মুঙেদে নিকুলের এরে চীর সত্য কথা এহানল যেসাদে তর্ক করানিরতা কিত্তাউ নেই। ঠিক অসাদে কুন আগর জরম বা দৌ অসি, এসাদে লেপ্পা বিষয় আহানলতে কিতার গবেষণা? পয়লাকা মরেল পাত্তাম আহান দিং, মি উজ্জিসুতা আশ্বিন মাহার ১ তারিখ ১৩৭৭ মারি (বঙ্গাব্দ), ইরেইরদিন, কিন্তু উজ্জিসু তারিখহানর ইংরেজী চুম্পা তারিখহান (১৮ সেপ্টেম্বর ১৯৭০) মাতে নুৱারিয়া য়্যাম বেসেপ অইল। স্কুলে ভর্তি করতেগা আনুমান করিয়া জরম তারিখ আহান দিলা। অহানে মর জরম সনদ, পাসপোর্ট, বার শিক্ষা সনদ হাব্বিত নাব্বে জরম তারিখহান তিলইল, চুমসে অহান হুদ্দা মর কঠিহাত থাইল। অবশ্য বাংলাদেশর শিক্ষা সনদে নাব্বে জরম দিন দেনার লই আহানৌ আসেগ! কিন্তু মর বিষয় অহান্তে হুত্তুমে হার নাপেইয়া। মি চেইলুতা, মরতা হুদ্দা নাগই। যে কোন পুরানা ঐতিহাসিক ভারতীয় (পাঞ্জীর) তারিখ অতার ইংরেজী বারো ইংরেজী তারিখর ভারতীয় তারিখ অতা হুরু-মুরু গবেষণা করিয়া লেপকরানি লাগের, যদি চুমকরে ইংরেজী বারো ভারতীয়, দ্বিয়হান তারিখ ইকরিয়া না থইলে। আমি পাঞ্জি বুলতে বাংলা ঠারল ইকরেসি পাঞ্জির গজে পুরাপুরি নির্ভর অরাং। মর মুরে পক কাইলা। নানান লেরিক লেইসু পাকরিয়া লমিতেগা আমার ঠারর সফটৱ্যার পাঞ্জি? লিঙখাত করলু।
শ্রীশ্রী ভুবনেশ্বর সাধুবাবার আবির্ভাব তিথি বারো তিরোধান তিথিল আমার সমাজে প্রচলিত নাবে নাবে তারিখ দেহিয়া অন্থকপা নুঙিনেই আহানৌ লাগের। ঙাক্করে দিবাং, শ্রীশ্রী ভুবনেশ্বর সাধুবাবার আবির্ভাব বারো তিরোভাবর তারিখহান বদালানির কা নাবে, জ্যোর্তির বৈজ্ঞানীক ভাবে প্রচলিত নাবে নাবে তারিখেত্ত চুম্পা তারিখহান বিসারিয়া নিকালানি অহানই এ ইকরা এহানর আৱৈপা নিঙপাহান। গবেষণা এহানর লাল চুমর কা মি নিখিল বিষ্ণুপ্রিয়া মণিপুরী মহাসভা বার শ্রীশ্রী ভুবনেশ্বর সাধুঠাকুর সেবাশ্রম-র মিল্লেঙ চাউরি।

শ্রীশ্রী ভুবনেশ্বর সাধুবাবার আবির্ভাব তিথি:

বেলিগর হিসাবল ধরলে ৩৬৫ দিন ১৫ দাণ্ড ৩১ পল বার ৩১.৪ বিপলে বসর (সৌর/সাবন বসর) আহান অন্যবেদে জুলাকগর হিসাবল ধরলে ২৯ দিন ৩১ দাণ্ড বার ৫০ পলে চান্দ্র মাহা আহান, এসাদে ১২ হান মাহা তথা ৩৫৪ দিন বার ২২ দাণ্ড (সুত্রঃ শ্রী সুর্য্য সিদ্ধান্ত) ইলে সামবৎসরি (সোম = জুলাক/চন্দ্র + বসর) আহান।
সাধুপুরুষ হাব্বির জরম বা মরন দিন সামবৎসরির হিসাবল পালন করানি অর। অহানল আমিয়ৌ শ্রীশ্রী ভুবনেশ্বর সাধুবাবার আবির্ভাব তিথি হিসাবে হারি বসর মিঙালর (জুলাকর/পহরর) পরগত? দ্বিতীয়া তিথি বা ভাতৃদ্বিতীয়া দিন এহানরে জবর দৌ নিংপা দিনহান করিয়া পালন করিয়া ভক্তি করিয়ার। ভাতৃদ্বিতীয়া তিথিত সাধুবাবা আর্বিভুত অসে অহানাত কারতাউ কুন বিতর্ক নেই, কিন্তু তারিখহানতে আমি নানান জাগাত নানান তারিখ পেয়ার।

পয়লাকা চেইক সাধুবাবা প্রতিষ্ঠিত শ্রী গোবিন্দবাড়ী, নবদ্বীপর ৱেব সাইটহানাত(http://www.gobindabari.com/index.php/founder.html), অহানাত মাতেসি ১০ কার্ত্তিক ১২৭৭ মারি, ভাতৃদ্বিতীয়া। তারিখ এহান ইংরেজী বা খ্রিষ্টীয় তারিখে সিল্করলে দেখরাং ২৬ অক্টোবর ১৮৭০ বুলিয়া।

প্রমাণঃ ১২৭৭ মারির বাংলা পাঞ্জি চেইক (সূত্রঃ পুরাতন পঞ্জিকা, প্রথম খণ্ড -শ্রীচন্দ্র বিধ্যানিধি, ১৩১১ সাল, পাঞ্জি এহান সংরক্ষিত আসে কলকাতার The Ram Krishan Mission Institute of Culture, Library, Acc. No: 92730, Class No: 5.29.23/SHR) ?এহাত তারিখ তিথি দ্বিয়হাত মিলিল।

পৃষ্ঠা ১০৩৫	পৃষ্ঠা ১০৩৬

অন্যবেদে http://bishnupriyamanipuri.blogspot.com/2007/09/sri-sri-bhubaneshwar-thakur.html#ixzz1EGdPUU6E সাইট এহানাত মাতেসি 26th October, 1871 যেহান সিল্করলে দেখরাং 10 কার্ত্তিক 1278 মারি, সাকলসেন, মিঙালর পরগ, তিরদশী তিথি বুলিয়া।

প্রমাণঃ ১৮৭১ খ্রিষ্টাব্দর ইংরেজীল ইকরেসি পাঞ্জি আহান চেইক (সূত্রঃ 100 Years’ Indian Calendar by Jagjivan Ganeshji Jethabhai, 2^nd Edition, 1926, পাঞ্জি এহানৌ সংরক্ষিত আসে কলকাতার The Ram Krishan Mission Institute of Culture, Library, ১০৮ নং পাতার ২৬ অক্টোবর ১৮৭১ খ্রিষ্টাব্দর লাইনহাত (রাঙা দাগল) চেইক, বিঙ্গেদেত্ত ৪ বার ৫ নং কলামে মাতেসি ১৩ বা S13 অর্থাৎ শুক্ল ১৩ বা ত্রয়োদশী, ৬নং কলামে মাতেসি ১০ কার্ত্তিক ১২৭৮ মারি)- এহাত তারিখ মিলিল, কিন্তু তিথি না চুমইল।

এমতাগা চেইক আমার ঠারর সফটৱ্যার পাঞ্জি?-এ কিহান মাতেরঃ

হাব্বিতা বিবেচনা করলে শ্রীশ্রী ভুবনেশ্বর সাধুবাবার শুভ আবির্ভাব দিনহানঃ ১০ কার্ত্তিক ১২৭৭ মারি, ভাতৃদ্বিতীয়া, ২৬ অক্টোবর ১৮৭০ খ্রীষ্টাব্দ অহানই চুমসে বুলিয়া লেপকরানির হেইচা থাইল।

শ্রীশ্রী ভুবনেশ্বর সাধুবাবার তিরোধান তিথিঃ
সাধুবাবার তিরোধান দিন অহানউ নানান জাগাত নানান তারিখ ইকরেসি। আমি পয়লাকাই আলোচনা করলাং সাধুপুরুষ মরন দিন সামবৎসরির হিসাবল পালন করানি অর বুলিয়া। অহানে আমারতা আগে হারপানি লাগতৈ সাধুবাবার তিরোধান তিথিহান কুম্পাগা? গৌড়িয় বৈষ্ণব সমাজে হাবিত্ত য়্যাকরতারা পাঞ্জিহান অইলতাই শ্রীশ্রীরাধাকুণ্ডত্ত নিকুলের ?ব্রতোৎসব-নির্ণয়-পঞ্জিকা?। অহানর যে কোন বসরর পঞ্জিকা চেইলেউ য়্যাকরতই মি ১৪১৪ মারির পাতা দুহান এহাত দিলু। ১১নং পাতাত দেহরাং, সাধুবাবার তিরোধান তিথিহান শ্রাবণ শুক্লপক্ষ প্রতিপদ বুলিয়া, বারো ১৪১৪ মারিত সামবৎসরিহান পরিসেতা ২৭ শ্রাবণ, ১৩ আগষ্ট।

মলাটহান	১১ নং পাতা

1. এমতাগা চেইক সাধুবাবা প্রতিষ্ঠিত শ্রী গোবিন্দবাড়ী, নবদ্বীপর ৱেব সাইটহানাত (http://www.gobindabari.com/index.php/founder.html), অহানাত মাতেসি তিরোধান দিনহান 1936 01 shravan Monday after 1.45 PM time; সাইট অহানাত আরাকউ মাতেসি সাধুবাবা ৭১ বসর বয়সে দৌর খয়া পাসে বুলিয়া। ১২৭৭ মারিত (বঙ্গাব্দ) ৭১ বসর যোগ করলে অরতা ১৩৪৮ মারি। অতাইলে 1348 মারির 1 হাওন, না এহান্তে চুম নার, কিদিয়া বুল্লে দিন অহানর বারহান সাকলসেন, তিথিহান নবমী বারো ইংরেজী ১৭ জুলাই 1941 খ্রীষ্টাব্দত পরের। অতাইলে চানা থক ১৯৩৬ খ্রীষ্টাব্দর পাঞ্জিহান। ঔ বসর 1 হাওন 1343 মারি, পরেরতা ইরেই, চতুরদশী, বারো ইংরেজী 17 জুলাই 1936 খ্রীষ্টাব্দত। এপেইত তারিখ বসর মিলিল, কিন্তু তিথি বার না মিলিল বারো সাধুবাবা ৭১ বসর বয়সেউ দৌ নাসে।
2. 2003 খ্রীষ্টাব্দত প্রকাশিত, সুনীল কুমার সিংহ গিরকর ?An Illustrated Pictorial Story In Bishnupriya Mnaipuri ? Shi Sri Bhubaneswarsadhu Thakur? (সূত্র: http://sunilartblog.wordpress.com/category/an-illustrated-pictorial-story-on-sri-sri-bhubaneswar-sadhu-thakur/page/2/) লেরিকহানর মতে ১৩৪৩ সনর ১লা শ্রাবণ সোমবার শুক্লা প্রতিপদ তিথিত সাধুবাবা দৌ অসে বুলিয়া, আগর অংশত মাতলু যে ১৩৪৩ সনর ১লা শ্রাবণ অরতাই ইরেই, চতুরদশী। অহানে তারিখ এহান চুমনাইসে।

1. থাংনাত চেইক, http://bishnupriyamanipuri.blogspot.com/2007/09/sri-sri-bhubaneshwar-thakur.html#ixzz1EGdPUU6E, সাইট এহানাত মাতেসি 17th July 1940 খ্রীষ্টাব্দত সাধুবাবা দৌ অসে বুলিয়া। যেহান সিল্করলে দেখরাং 1 হাওন 1347 মারি, ইনসাইনসা, জুলাকর পরগ, তিরদশী বুলিয়া। বারো সাধুবাবা ৬৯ বসর বয়সে দৌ অসে বুলিয়া। আমি আগে লেপকরলাং ১৮৭০ খ্রীষ্টাব্দত সাধুবাবা আবির্ভাব অসে বুলিয়া। অহানে তিরোধানর বসরহান ১৮৭০+৬৯ =১৯৩৯ অনা থক। অহানে মাতে পারিয়া বসরহান বারো বারহান না মিলিল। এমতাগা চেইক ১৯৩৯ খ্রীষ্টাব্দর পাঞ্জিহান। ঔ বসরর 1 হাওন 1346 মারি, তিথিহান মিঙালর পরগ প্রতিপদ, বারহান নিংথৌকাপা, বারো ইংরেজী 17 জুলাই 1939 এরে তারিখ এহানর বার, তিথি, বসর মিলের বারো সাধুবাব ৬৯ বয়সে দৌ অসে কথা অহানৌ মিলের।
2. ১৯৩৯ খ্রীষ্টাব্দর ৱেব পাঞ্জি আহান @ http://www.prokerala.com/general/calendar/hinducalendar.php?year=1939&mon=asvina&la=hi&sb=

1. লমিতেগা চেইক আমার ঠারর সফটৱ্যার পাঞ্জি-র স্ক্রীনসট আহান:

তা থকয়া শ্রীশ্রী ভুবনেশ্বর সাধুবাবার তিরোধান দিনহানঃ ১ হাওন ১৩৪৬ মারি, শুক্ল (মিঙালর পর) প্রতিপদ, ইংরেজী ১৭ জুলাই ১৯৩৯ খ্রীষ্টাব্দ অহানই চুমসে বুলিয়া লেপকরানির হেইচা থাইল।

১৩৪৬ (বঙ্গাব্দ) মারির, প্রতিপদর দিনে সাধুবাবার তিরোধান অইলে থাংনাকার বসর ১৩৪৭ মারির প্রতিপদ তিথিত সাধুবাবার ১ম তিরোধান তিথি অইতই এ হিসাব এহানল তলে ১-২০০তম তিরোধান তিথির তারিখ দেনা অইল।

পাংলাক পাসু লেরিকঃ

১। মূল শ্রীসুর্য্যসিদ্ধান্ত, শ্রীবিজ্ঞানানন্দ স্বামী, কলিকাতা ১৩১৬ সাল (১৯৩৯ খ্রীঃ)

২। শ্রীশ্রীহরি ভক্তি বিলাস, মূলঃ শ্রীল গোপালভট্ট-গোস্বামী, টিকাঃ শ্রীলশ্রীযুক্ত-সনাতন-গোস্বামী,
সম্পাদনাঃ শ্রীশ্যমাচরণ কবিরত্ন, কলিকাতা ১৩১৮ বঙ্গাব্দ

৩। পুরাতন পঞ্জিকা, প্রথম খণ্ড -শ্রীচন্দ্র বিধ্যানিধি, ১৩১১ সাল, পাঞ্জি এহান সংরক্ষিত
আসে কলকাতার The Ram Krishan Mission Institute of Culture, Library, Acc. No: 92730,
Class No: 5.29.23/SHR

৪। 100 Years Indian Calendar by Jagjivan Ganeshji Jethabhai, 2^nd Edition,
1926, পাঞ্জি এহানৌ সংরক্ষিত আসে কলকাতার The Ram Krishan Mission Institute of Culture,
Library

৫। ব্রতোৎসব-নির্ণয়-পঞ্জিকা

৬। সুনীল কুমার সিংহ গিরকর “An Illustrated Pictorial Story In Bishnupriya Mnaipuri
Shi Sri Bhubaneswarsadhu Thakur”

পাংলাক পাসু ওয়েব সাইটঃ

১। http://www.gobindabari.com

২। http://bishnupriyamanipuri.blogspot.com

৩। http://www.prokerala.com

গনানি পাঙলাকে:

১। সফটওয়্যার পাঞ্জি, -উত্তম সিংহ